http://www.euskararenetxea.net/mediategia

Euskararen Interpretazio Zentroko Euskararen Mediategiaren helburua honako hau da: orain arte euskaraz argitaratu den material guztiarekin artxibo multimedia bat osatzea (CD, disketeak, DVD).

Gainera, bildutako materiala Mediategian bertan ikusiko da, horretarako beharrezkoak diren sistema eragile, hardwarea eta bistaratzaile jakin batzuen bertsioak (Quicktime, soinu eta bideo txartelak, etab...) eskura egongo dira, nahiz eta horietako batzuk merkatutik at egon.

	Euskararen Mediategiko azalera 97,30 metro karratukoa da, eraikineko bigarren solairuan. 16 kontsulta gune eta 16 ordenagailu ditu, eta horien bidez, programa eta material desberdinetara sartu ahal izango da. Gero eta nabarmenagoa da orain arte ekoiztu den material digital guztia, bai euskaraz eta baita edozein hizkuntzatakoa ere, katalogatu eta bildu egin behar dela.

··> Honela jokatzeko dagoen arrazoi nagusienetako bat hau da: gisa honetako materialak ez direla sistematikoki bildu ez biblioteketan ezta inongo gune kulturaletan ere, eta beraz, ez litzatekeela harritzekoa horietako asko eta asko jada betirako galduak izatea, eta beste kasu batzuetan berriz, ale bakanak bakarrik gelditzea erabiltzeko moduan jabe partikularren eskuetan.

Mundu digitalean aspaldian sartuta dauden erabiltzaileek, aldizkari espezializatuetan irakurtzen den bezala, badute beste arazo baten berri: produktu zaharkituak ezin dira irakurri gaur egungo teknologia duten konputagailuekin. Hots, lehenengo urteetan erositako hainbat CD ezin dira kontsultatu gaurko ordenagailuetan, aipatu CDetan erabiltzen diren programak arras zaharkiturik gelditu direlako.

Horregatik, beharrezkoa da egoera honi erantzun egoki bat ematea. Bestela erakundeek eta enpresa pribatuek alor honetan egindako esfortzu eta lan handia gal liteke urte gutxitan. Gainera, kontutan hartu behar da informazio hau ezin dela eraman internetera, beharrezkoa baita gune fisiko bat izatea kontsultak aurrera eramateko.

« itzuli